多肉動物-以食物為座標的女人

上芳的一碗麵 / Devon

若講起高雄，是最近臺灣觀光上蓋奢颺的城市，真濟活動攏佇高雄舉辦，做一个高雄在地的囡仔，尤其是我自細漢佇鹽埕埔，看著這馬鬧熱滾滾的街仔路，予人有足大的光榮感。

足濟人佇歇睏日的時陣，足愛去鹽埕埔𨑨迌，順紲食傳統好食物佮踅文創市場，坐佇時行的咖啡廳內底，了解附近建築的歷史。阮阿媽在生的時，是佇新興街的旅館內底咧做工課，我佮阮阿爸去接伊下班的時陣攏足晏矣，所以會佇路口的三角窗食宵夜。這間較早是𥴊仔店，亭仔跤有咧賣焦麵，這攤的油蔥酥芳貢貢，予行過的人攏擋袂牢，生理做甲削削叫。因為阮定定來食宵夜，食了頭家嘛欲整理收攤，阿爸就會那鬥相共那開講，久了後嘛攏足誠熟似矣，這間攤就是尾仔開店面的「阿財雞絲麵」。

阿財的頭家姓張，伊對食材毋但真內行閣誠頂真，𪜶兜這碗麵所有的物件，攏是家己做的閣無加防腐劑，予人食起來加足安心。若講著這个雞絲麵，欲做嘛真厚工，看起來親像是泡麵，毋過閣較幼範，是使用鴨卵、雞卵來做的，愛閣用豬油共麵體先糋過，煮起來袂爛糊糊，哺的時陣嘛較𩚨，芳味嘛佮別間無仝。夭壽芳的油蔥酥，頭家採用的是台南品質上好的紅蔥頭來製作，因為紅蔥頭一冬才收兩期爾爾，見擺若做，就是千五斤以上。遮全部製作過程是祕密，頭家嘛無欲單獨賣予人客。雞絲麵頂懸的雞絲嘛無簡單，頭家共閹雞買轉來了後閣予雞仔佇後山運動，所以逐隻攏足健康，食起來無臭羶味而且嘛較精，佮麵體有影是足鬥搭。這碗無簡單的雞絲麵，一碗才賣你五十五箍，是毋是實在是有夠俗？

阿財雞絲麵是足濟鹽埕埔點心攤的縮影，雖罔毋是總鋪師，愛包辦規桌豐沛的菜色，一間店干焦賣簡單彼幾項，就予頭家無閒規工。傳統的古早味欲長年維持仝款的水準，除了龜毛的個性，閣愛骨力，袂使定定歇睏，頭家講：「雄雄無開，遐逐工來的老顧客欲按怎？」這種負責任的態度，嘛予人真欽佩。

這馬踏入去店裡，我攏會學阮阿媽喝講：「頭家，今仔日仝款一組。」頭家有閒閣會關心阮阿爸的身體，離開進前閣會笑笑仔對阮講：「有閒才閣來坐。」這款的人情味是別的所在無才調學的，這嘛是我足愛高雄的原因。